Rainwater harvesting facility sa La Paz plaza nahubsan sa labing una nga tiun tungod sa El Niño phenomenon
ILOILO CITY – Nahubsan sa labing una nga tiun ang rainwater harvesting sa La Paz plaza nga ginakuhaan sang tubig agud ibunyag sa mga tanom sa kada plaza kag mga dalanon sa siyudad.
Ini ang ginpabutyag ni Engr. Neil Ravena, head sang General Services Office (GSO) sa mga epekto sang El Niño phenomenon sa siyudad.
Ang tubig nga ginakuha sa rainwater harvesting ginagamit agud ibunyag sa mga tanom sa Diversion Road, General Luna Street, kag mga district plazas sa siyudad.
Sa subong, nagakuha sang tubig nga gamiton sa pagbunyag ang mga personnel sang Task Force Beautification kag City Environment and Natural Resources Office (CENRO) sa bubon nga nahamtang sa vicinity sang Central Philippine University (CPU) kag Iloilo River Esplanade.
Una na nga ginpahayag sang PAGASA nga lakip ang siyudad sa mga naka-experiensiya sang dry spell ukon “below-normal” nga rainfall condition sa sulod sang tatlo ka bulan tungod sa epekto sang El Niño phenomenon.
