P1.9 million nga balor sang suspected shabu, pusil na-recover sa drug buy bust operation sa Arevalo

ILOILO— Na-recover ang P1.9 million nga balor sang suspected shabu sa drug buy bust operation sa Brgy. Sto. Niño Norte, Arevalo kahapon, Pebrero 27.

Ginkilala ang subject kay alyas Onad, 41-anyos sang Tanza Bonifacio, City Proper pero temporaryo nga nagatiner sa Arevalo.

Nadakpan man ang live-in partner sang subject nga si Inday, 20-anyos nga tumandok sang San Rafael, Mandurriao kag alyas Mark, 27-anyos sang Calumpang, Molo nga natabuan nagbakal sang illegal drugs.

Suno kay Police Captain Glenn Soliman, Officer-In-Charge sang Regional Police Drug Enforcement Unit (RPDEU) 6, nabaklan ang subject sang isa ka bulto sang suspected shabu sa balor nga P12,000.

Na-recover pa gid ang dugang nga 16 ka sachets sang suspected shabu kag apat ka knot tied plastic sachets sang illegal drugs nga nagabug-at sang 280grams. Nakuha man ang .38 revolver kay Onad.

Sa pagpangusisa sang police, sa Iloilo City lang nagakuha sang supply sang illegal drugs ang subject kag ginabaligya sa mga parokyano sa syudad kag probinsya.

Napresu na sadto si Onad sa kaso may kaangtanan sa illegal drugs kag nakaguwa sang 2020 tungod sa plea bargaining agreement.

Gindugang ni Soliman nga gina-target na sa City Proper si Onad tungod sa iya involvement sa illegal activities pero nanotisyaran niya gani nagsaylo sa Arevalo. — via Aksyon Farrah Mae Morano