Masobra P400k nga balor sang suspected shabu na-recover sa drug buy bust operation sa Jaro

ILOILO— Nakuhaan sang 11 ka sachets sang suspected shabu ang 35-anyos nga babaye sa drug buy bust operation sa Tabuc Suba, Jaro kagab-i, Pebrero 27.

Ginkilala ni Major Eduardo Siacon Jr., hepe sang Jaro Police Station ang subject kay alyas Nadia nga ginakabig High Value Individual (HVI) drug personality.

Nabaklan si Nadia sang isa ka sachet sang suspected shabu sa balor nga P15, 600 kag nakuhaan pa gid ang dugang nga pulo ka sachets.

Ginabanta nagabug-at sang 65grams ang mga na-recover nga illegal drugs nga may standard drug price nga masobra P400,000.

Sa pagpangusisa ni Siacon, sa Muntinlupa nagakuha sang supply sang illegal drugs ang subject kag ginapadala sa mga courier padulong sa Iloilo.

Madugay na nga nagaguwa ang ngalan sang subject nga na-angut sa illegal drugs tungod gindakup man sa drug buy bust operation ang magulang niya, suno sa police.

Sang napresu ang magulang sang subject, siya na ang nagbulos sa illegal nga aktibidad, suno kay Siacon.

Ginapatihan sang police nga may upod pa sa pagbaligya sang illegal drugs ang subject kag ginabaligya sa mga parokyano sa amo man nga lugar. — via Aksyon Farrah Mae Morano