Mag-asawa brutal nga ginpatay sa San Lorenzo, Guimaras

GUIMARAS — Utod ang ulo sang asawa samtang nagahabil-habil ang liug sang bana sang nasapwan sa Brgy. Constancia, San Lorenzo, Guimaras, las-2:30 kahapon sang hapon.

Suno kay Police Colonel Rhea Santos, director sang Guimaras Police Provincial Office, may na-recover nga basiyo sang mga bala sa diin nasapwan ang mag-asawa nga Nestor kag Remedios Egaran, pareho nga 64 anyos.

Sa subong, ginalantaw sang police nga gintata sang tiro ang mag-asawa kag lunsay sa liug ang igo.

Base sa imbestigasyon, mga pasado las-3 sang hapon sang Marso 13 may nabatian nga mga lupok ang mga residente sang amo nga barangay pero wala man nila ginsapak tungod sa pagpati nga lupok ini sang firecrackers.

Subong nga hapon, nagkadto sa balay ang himata sang mag-asawa kag na-abtan na lang ang bangkay nila nga duha nga yara na sa advanced state of decomposition.

Duha lang nga nagapangabuhi ang mag-asawa sa balay kun sa diin nasapwan ang ila bangkay.

Padayon pa ang imbestigasyon sang kapulisan kun sin-o ang responsable sa pagpatay sa mag-asawa. —via Angel Mae Ciudad