Lalaki gintiro sa Boulevard, Molo

ILOILO CITY — Naghuray-ad sa karsada ang lalaki nga gintiro sa Barangay Boulevard, Molo, malapit sa barangay hall.

Ginkilala ang biktima kay Zaldimer Hellega, residente sang Zone 5, Boulevard, Molo suno kay Boulevard Punong Barangay John Villanueva.

Gin-identify naman sang kapitan ang nagtiro kay Gerardo Sopia alyas Bulldog, residente man sang Boulevard.

Suno sa kapitan, nagabiyahe sang motorbike si Hellega kag nagadul-ong kada aga sa iya asawa nga side walk vendor sa downtown.

Manug-las-nueve subong nga aga sang pauli na si Hellega sang gintiro. Natumba sa iya motor si Hellega kag nakadalagan pa pero ginlagas sang suspek kag liwat gintiro.

May igo sa dughan kag ulo ang biktima.

Ginkumpirmar ni Kapitan Villanueva nga pareho nga napreso sa kaso may kaangtanan sa illegal drugs ang biktima kag suspek pero nakaguwa tungod sa plea bargaining agreement.

May na-recover nga pito ka empty shells sa crime scene.

Gindala na sang ICER ang biktima sa ospital. — via Aksyon Paula Elambayo/Justice Savannah Pamplona