52-anyos nga babaye nga nasapwan sa Miagao positibo nga ginhimuslan suno sa pulis

ILOILO — Positibo nga ginhimuslan si Marivic Felesicimo, ang 52-anyos nga babaye nga nasapwan nga patay sa Brgy. Tambong, Miagao sang Abril 7 sang gab-i nga yupok ang agtang kag wala na sang panty.

Ginkumpirmar ini ni Police Capt. Francis Donne Lomahan, hepe sang Miagao Police Station. Suno kay Lomahan, napaidalum na sa autopsy ang bangkay ni Felecisimo kag ginahulat na lang nila ang opisyal nga resulta agud mapasaka ang kaso batok sa suspect.

Ginpabutyag ni Lomahan nga suspect na sa krimen ang 26-anyos nga lalaki nga nakit-an sa CCTV footage nga nagalakat sa karsada kag ginasundan ni Felecisimo sang gab-i nga ulihi siya nakit-an nga buhi.

May nga witness nga nakuha ang kapulisan suno kay Lomahan kag may mga circumstantial evidence man sila nga makatudlo sa suspect.

Tubtob subong wala pa mabal-an kun diin nagkadto ang suspetsado apang may naga-monitor na sa iya suno pa kay Lomahan agud matumod ang iya ginatiniran.

Nagabulig man sa police ang mga barangay officials kag ang pamilya sang suspetsado agud madasig nga masulbar ang krimen.

Ginatun-an pa sang police kun ano gid nga kaso ang ipasaka batok sa suspetsado.