Ceres bus nasunog sa Anilao; 45 ka pasahero nakaluwas
ILOILO — Wala sang may napilasan sa 45 ka mga pasahero sang Ceres bus nga nasunog sa Brgy. Sambag Culob, Anilao kaina sang aga.
Suno kay SFO3 Gosue Castillo, acting municipal fire marshal sang Anilao-Bureau of Fire Protection, halin sa Concepcion kag pakadto sa Iloilo City ang Ceres bus.
Samtang nagabyahe, nabatyagan sang driver nga nag-wild ang makina kag indi normal ang dalagan sang bus rason nga nagpahigad siya.
May pasahero nga nakakita nga naga-aso ang likod nga porsyon sang Ceres bus kabangdanan madasig niya nga ginbuksan ang pwertahan kag ginpapanaug ang mga pasahero.
Nagkalayo ang bus apang ginpalong sang driver ang kalayo paagi sa fire extinguisher tubtob nga nag-abot ang mga bombero.
Naglawig sang lima ka minutos ang pagpalong sang mga bombero sa nagakalayo nga Ceres bus.