Visayas Grid ginpahamtang sa Red Alert Status tungod sa ginakulang nga supply sang elektrisidad
ILOILO CITY – Ginpahamtang sang National Grid Corporation of the Philippines (NGCP) ang Visayas grid sa Red alert status tungod madamo nga mga power plants ang nag-force outage ukon shutdown kagab-i, Abril 16.
Ginpaathag ni NGCP Lead Specialist Reagahn Alcantara nga ginakulang ang supply sang kuryente rason nga magapatuman sila sang Manual Load Dropping sa nagkalain-lain nga parte sang Visayas lakip na ang porsyon sang Iloilo.
Sa bug-os nga Visayas, 12 ka mga power plants ang nag-force outage lakip na ang tatlo ka planta sa Panay, samtang may pila ka mga planta ang may derated capacity ukon indi malab-ot ang normal nga power sang kuryente nga ma-supply sa NGCP.
Tungod sini, gin-abisuhan sang NGCP ang mga konsumedor nga posible may magluntad nga power interruption halin las-siete tubtob las-nueve subong nga gab-i sa diin mataas ang demand sang kuryente.
