Facade sang Iloilo Central Market gin-demolish

Ginkasubo sang pila ka mga vendors ang pag-demolish sa facade ukon intrada sang Iloilo Central Market.

Suno sa mga vendors nga nasugilanon sang Aksyon Radyo Iloilo news team, wala na sang may nabilin sa orihinal nga istruktura sang merkado. Nangin emosyonal ilabe na ang mga nagdaku kag natubuan sang buot sa merkado.

Natingala na lang sila nga wala na ang facade pagbalik nila sa merkado pagkatapos sang Semana Santa.

Ginakabig na nga heritage building ang merkado nga ginbuksan sang January 15, 1912, suno sa Ilonggo historian nga si Mr. Nereo Lujan.

Gina-renovate subong ang Iloilo Central Market paagi sa Public-Private-Partnership.

Nabutang sa inisyal nga plano sang proyekto nga ipabilin ang orihinal nga facade.

Nagpaguwa naman sang statement si Iloilo City Mayor Jerry Treñas nga nahisugtan sang City Government kag Iloilo City Cultural Heritage Conservation Council nga ipatukod na lang liwat ang bilog nga merkado.

Ginpa-athag sang alkalde nga base sa evaluation, indi na safe ang istruktura kag mahuyang na gani ginpakamaayo na lang nga ipa-reconstruct ini kag sundon lang ang orihinal nga desinyo.