P1.1 million nga balor sang suspected shabu na-recover sa drug buy bust sa Molo; Main subject nakapalagyo

ILOILO CITY — Naglab-ut sa P1.1 million nga balor sang suspected shabu ang na-recover sa buy bust operation sang Regional Police Drug Enforcement Unit (RPDEU) sa Brgy. San Pedro, Molo kaina sang kaagahon.

Ginkilala ang nadakpan kay alyas Teban samtang ang main subject ginkilala kay alyas Raprap nga live-in-partner ni Ave Rose Prevendido, ang 18-anyos nga babaye nga nadakpan sa Dungon A, Jaro kahapon, Abril 17.

Suno kay Police Captain Ryan Christ Inot, team leader sang Regional Police Drug Enforcement Unit, isa sa mga ginbuyagyag ni Ave Rose ang ngalan sang iya live-in partner nga si Raprap nga naga-engage sa illegal drugs rason nga nag-conduct sila sang follow-up operation.

Sa operasyon sang police, nabaklan si Teban sang isa ka sachet sang suspected shabu sa balor nga P14,000 samtang nagpalagyo sakay sa motorsiklo si Raprap sang namutikan nga police ang ila ka-transaksyon.

Na-recover sa nadakpan ang 14 ka magagmay nga plastic sachet kag lima ka dalagku nga putos sang suspected shabu. — via Aksyon Paula Elambayo