Bidding para sa 2nd phase sang rectification sang Ungka Flyover posible buksan subong nga semana

Ginapaabot nga buksan subong nga semana ang bidding para sa second phase sang rectification sa P680 million pesos nga Ungka Flyover.

Ginpahayag ni Department of Public Works and Highways (DPWH 6) Regional Director, Engr. Sanny Boy Oropel, nga sa idalum sang ikaduha nga phase, kakason ang salog sang ikaapat, ikalima kag ikaanum nga haligi sang flyover kag posible ilisan ang design.

Kun mabuksan ang bidding, gilayon nga i-award ang kontrata kag suguran ang repair.

Una na ginpahayag ni Engr. Oropel nga bukas tanan nga qualified contractors ang bidding para sa second phase lakip na ang International Builders Corporation (IBC), ang orihinal nga flyover project contractor.

Sa first phase sang rectification, ginpaidalum sa intense jet grouting ukon pag-inject sang semento sa 13 ka mga haligi sang flyover.

Sa subong, 28% pa lang ang completion sa first phase sang rectification sang UFO.

Ginapaabot nga matapos sa Hulyo ang first phase suno sa DPWH 6.

Maga-coordinate naman ang DPWH 6 sa Traffic Management Unit sang Pavia kun suguran na ang second phase sang rectification agud nga ma-control ang trapiko sa lugar. — via Aksyon Hotline