Pagpanagtag sang potable water sa mga “most affected” barangays sa Iloilo City magalawig sang 3 ka bulan — CENRO/GSO Head, Engr. Neil Ravena
ILOILO CITY – Magalawig sang tatlo ka bulan ang pag-augment sang potable water sa mga barangay sa siyudad sang Iloilo nga pinaka-apektado sang water crisis tungod sa El Niño phenomenon.
Nagalaum si Engr. Neil Ravena, head sang City Environment and Natural Resources (CENRO) kag General Services Office (GSO), nga may mapilian na nga bulk water supplier sa masunod nga semana agud mangin tayuyon ang pagpanagtag sang tubig sa 25 ka mga “most affected” barangays sa siyudad.
Una na nga nakabaton sang donasyon ang Iloilo City government sang 10,000 cubic meters ukon 10 million liters nga potable water kag 30,000 liters pa lang diri ang na-distribute sa mga apektado nga barangays sa duha ka adlaw.
Nagapadayon ang distribution sang tubig sa mga barangays, suno kay Ravena.
Pananglitan maglala ang epekto sang El Niño sa siyudad, posible suno kay Ravena nga madugangan ang 25 ka mga barangays nga hatagan sang tubig tungod base sa projection sang PAGASA, magalawig tubtob Hulyo ang mainit nga tiyempo.
Base naman sa computation sang siyudad, nagakinahanglan sang 696 cubic meters ukon 696,000 liters kada adlaw ang mga apektado nga barangays.
Sang Abril 22, ginpa-idalom sa state of calamity ang siyudad tungod sa water crisis sa diin gin-aprubahan ang P12.5 million nga quick response fund. — via Firingline
