Iloilo nadulaan sang 85 ka ektariya sang tree cover sa nakaligad nga 21 ka tuig — Global Forest Watch
ILOILO – Linibo na ka ektariya sang tree cover ang nadula sa Iloilo province sa nakaligad nga duha ka dekada, base sa data sang Global Forest Watch (GFW).
Kun basehan ang data, may kabug-usan nga 85 kilo-hectare (kha) ukon 85,000 ka ektariya sang tree cover ang nadula sa probinsiya sang Iloilo halin sang 2002 tubtob 2023.
Ang GFW amo ang online platform nga puwede mabuksan sang tanan sa diin makita ang real-time forestry information kag iban nga data natuhoy sa kagulangan sa bug-os nga kalibutan.
Base sa ila dataset, gin-define ang “tree cover” bilang “all vegetation greater than five meters in height and may take the form of natural forests or plantations across a range of canopy densities.”
Samtang ang “loss” nagatumod sa pagkadula sang puno sang kahoy tungod sa nagkalain-lain nga rason – indi lang deforestation kundi lakip na ang mechanical harvesting, pagkasunog, pagkapatay, ukon nahalitan sang kalamidad pareho sang bagyo.
Sang 2010 nga data sang GFC, ang Iloilo may 129 kilo-hectare nga natural forest. Pero sang 2023, nadula ang 199 ka ektariya sang natural forest sang tree cover.
LUGAR SA ILOILO NGA MAY MADAMO NGA PUNO SANG KAHOY NGA NADULA
Sa pareho nga data halin sa GFW, nagapakita nga ang Lambunao, Iloilo ang may pinakadaku nga tree cover loss sa diin 2,120 ektariya ang nadula halin sang 2001 tubtob 2023.
Ginasundan ini sang Concepcion nga may 831 ektariya; San Dionisio nga may 667 ektariya; Ajuy nga may 266 ektariya; Passi City nga may 551 ektariya; Calinog nga may 539 ektariya; Barotac Viejo nga may 501 ektariya; Janiuay nga may 498 ektariya; Sara nga may 494 ektariya; kag Lemery nga may 482 ektariya nga tree cover loss.
Una na nga nagpanawagan ang Iloilo Provincial Environment and Natural Resources Office nga magtanom sang kahoy agud malikawan ang pagbaha.
