Negosyante patay sang gintiro sang lalaki nga may diperensiya sa paminsaron sa Miagao; Suspek nga nanago sa iya balay matapos ang krimen DOA sa ospital
ILOILO — Dead-on-arrival sa ospital ang negosyante nga lalaki sang natiruhan sa Brgy. Mat-y, Miagao kahapon, Mayo 9.
Ini ang ginkumpirmar ni Capt. Francis Doanne Lomahan hepe sang Miagao Municipal Police Station.
Base sa pagpangusisa ni barangay kagawad Denmark Jude Pailano, may gina-inquire nga duta ang biktima nga si Pio Javier sang Brgy. Tacas, Miagao malapit sa balay sang suspek sang natabo ang pagpangtiro.
Samtang may ginahulat ang biktima, nagguwa sa ila balay ang suspek nga si Renato Fredecilla kag gintiro ang biktima, suno sa iya.
Pagkatapos ang insidente suno sa kagawad, nagbalik sa sulod sang balay ang suspek kag ginsunod sang iya nga utod agud istoryahon. Pero sang nagguwa na ang iya nga utod, nagpalupok sang pusil ang biktima.
Indi lubos nga kilala sang kagawad ang suspek tungod wala man ini nagaguwa sa ila balay. Apang iya ginkumpirmar nga may diperensiya sa paminsaron ang suspetsado.
Suno naman kay Miagao Mayor Richard Garin, gin-negosyar nila mga pasado las-tres sang hapon ang suspek nga mag-surrender pero padayon nga nagapakatig-a. Nagapanguna sa pagnegosyar kay Fredecilla ang iya man pamilya upod sa kapulisan.
Base sa impormasyon, nagdiretso sa ila balay si Frecilla pagkatapos nga gintiro si Javier kag imbes nga magsungka sa police, ginpahayag ni Mayor Garin nga ginpalukpan pa niya ang mga otoridad.
Gina-imbestigaran pa sang kapulisan kun ano ang motibo ni Fredecilla sa pagpatay kay Javier.
Nagdesisyon ang police nga habuyan sang tear gas ang balay ni Fredecilla kag manug-las-10 subong nga gab-i nakasulod ang mga pulis sa balay.
Gin-report nga may pilas ang suspek kag wala sang pangalibutan sa sulod sang balay.
Pasado las 10 na sang gab-i sang ginsulod sang kapulisan ang balay sang suspetsado.
Sang ginsulod sang kapulisan ang balay, nakita siya nga nagakayaon kag may pilas si Fredecilla rason nga ginhingagaw dala sa ospital apang gindeklarar nga dead-on-arrival.
Indi naman makahambal si Iloilo Police Provincial Office Spokesperson, PMAJ Rolando Araño kun paano napilasan ang suspek. — via Aksyon Farrah Mae Morano
