Mga SB members sa Estancia ginpasakaan sang kaso sa Ombudsman ni Mayor Mary Lyn Mosqueda

ILOILO — Ginhatagan sang 10 ka adlaw sang Ombudsman Visayas ang mga Sangguniang Bayan Members sang Estancia nga magsabat sa kaso nga paglapas sa Graft and Corrupt Practices Act nga ginpasaka ni Mayor Mary Lyn Mosqueda.

Ginpasakaan sang kaso kanday SB members Bobby Gadayan, Benjie Montero, Vicente Calibre, Rey Bataga, Rowena Placencia, Rene Aclaro, Louigi Donn Cordero, Jacqueline Gealon, kag Emannuel Tingson.

Nalakip man sa ginkasuhan kanday SK Federation President Mary Margareth Uy, kag president sang Liga ng mga Barangay sa banwa nga si Sancho Navarro, Jr.Base sa order nga ginpadala sang Ombudsman Visayas kay Mayor Mosqueda, required nga magsumiter sang counter affidavit ukon ebidensya ang mga ginpasakaan sang kaso.

Nag-ugat ang kaso suno kay Atty. Oscar Tagamolila, legal counsel sang alkalde, sa gin-alegar pagbuhin sang executive budget ni Mayor Mosqueda sa diin apektado ang iya nga delivery service.

Gindugang pa sang abogado ni Mosqueda nga makapila ka beses na ini nga natabu rason nga nagpasaka na sang legal measure ang alkalde.Pebrero 12 sang ginpasaka sang alkalde ang kaso sa Ombudsman Visayas.

Ginatinguhaan pa sang Aksyon Radyo Iloilo nga makakuha sang pahayag sa mga ginpasakaan sang kaso. — via Aksyon Cedrick Anona