Driver sang motorsiklo patay sang nakabunggo sa isa pa ka motorsiklo sa Concepcion, Iloilo

ILOILO— Patay ang driver sang motorsiklo sang nakabunggo sa isa pa gid ka motorsiklo sa Poblacion, Concepcion sang Mayo 20 sang gab-i.

Ginkilala ang napatay nga driver sang motorsiklo kay Christian Delos Santos, 26-anyos sang Toloto-an, Concepcion.

Suno kay Police Chief Master Sergeant Edzel Casia, imbestigador sang Concepcion Municipal Police Station, halin sa Poblacion si Delos Santos sakay sa iya motorsiklo sang naglapaw sa iya nga linya kag nakabunggo sa kasugata nga motorsiklo.

Tungod sini, nagtabog ang mga sakay sang duha ka motorsiklo.

Nakaagum sang pilas sa idalum sang tuo nga dulungan ang angkas ni Delos Santos nga si Herardo Bano, 31-anyos.

Samtang pilason naman ang driver sang isa pa ka motorsiklo nga si Fritz Raniel Cristobal, 26-anyos kag iya nga asawa nga si Shaira Mae sang Bacjawan Sur, Concepcion.

Ginpangdala sa ospital ang mga sakay sang motorsiklo. — via Aksyon Farrah Mae Morano