Leon LGU may public viewing sa coronation night sang Miss Universe Philippines 2024 agud suportahan si Alexie Mae Brooks
ILOILO – Nagasamo nga kalangkag kag kakulba ang nabatyagan sang mga Leonian para kay Miss Iloilo City Alexie Mae Caimoso Brooks sa coronation night sang Miss Universe Philippines 2024 buwas sa gab-i, Mayo 22.
Si Alexie ang tumandok sang Brgy. Buga, Leon kag ginkoronahan nga Miss Iloilo gani siya ang ginpadala sa prestihiyoso nga national pageant.
“Kami subong, we are excited and at the same time a bit nervous but we really believe nga makaya ni Alexie [ang coronation],” pahayag ni Leon Mayor Ma. Lina Holipas.
Kumpyansa ang alkalde nga makuha sang Ilongga beauty queen ang korona tungod isa siya sa mga nagapanguna nga kandidata sa mga pre-pageant activities kag maayo ang preparasyon antes ang coronation.
Bilang pagpakita sang suporta kay Alexie, may yara sang public viewing ang local government unit sang Leon sa plaza sang banwa agud madamo ang makalantaw sa coronation night, suno kay Mayor Holipas.
Ginkumpirmar man sang alkalde nga mapadulong siya sa Manila kaupod kay Congressman Michael Gorriceta kag mga miembro sang municipal council agud makalantaw sang live sa coronation sa Mall of Asia Arena. Magluwas diri, madamo man nga taga-Leon ang nagpadulong na sa Manila.
Nagpanawagan si Holipas sa mga Ilonggos nga magpangamuyo para kay Alexie agud matahom nga performance ang iya mapakita. — via Aksyon Hotline
