Regional Mass Oath-taking sang Partido Federal ng Pilipinas hiwaton sa Hunyo 2; EA Raisa Treñas-Chu nagdesisyon nga indi na magsumpa sa partido
ILOILO — Hiwaton sa siyudad sang Iloilo sa Domingo, Hunyo 2 ang Regional Mass Oath-Taking sang Partido Federal ng Pilipinas (PFP).
Ini ang ginkumpirmar ni Iloilo Governor Arthur Defensor, Jr., regional party chairman sang PFP, makaligad nga na-postpone sang pila ka beses ang oath-taking.
Suno sa gobernador, hiwaton ang aktibidad sa Grand Xing Hotel, las 2 sa hapon kag pagatambungan sang mga local officials halin sa Iloilo province, Iloilo CIty, Guimaras, kag Negros Occidental.
Imbitado sa okasyon sanday Iloilo City Mayor Jerry Treñas, Special Assistant to the President Sec. Antonio Lagdameo kag South Cotabato Governor Reynaldo Tamayo, Jr.
600 ka mga local officials halin sa Iloilo province ang masumpa sa PFP nga ginabug-usan sang mga Barangay Captains, Sangguniang Bayan members, Mayors, kag Board Members suno sa gobernador.
Ginahulat pa ni Defensor ang ngalan sang mga masumpa sa Iloilo City kag Guimaras samtang naga-coordinate man siya sa Negros Occidental para sa dugang nga local officials nga maupod sa partido.
INDI MAGSUMPA SA PARTIDO SI RAISA TREÑAS-CHU
Ginkumpirmar naman ni Gov. Defensor nga indi magsumpa sa PFP si Executive Assistant Raisa Treñas-Chu, ang bata ni Mayor Treñas.
Ginpaathag sang gobernador nga nagtawag na sa iya si Chu kag nagpahibalo nga indi siya magsumpa sa partido.
Apang ginsulit sang gobernador nga indi matuod nga may nagapugong sa pagsumpa ni Raisa tungod nasumiter na niya sa PFP national ang ngalan sang mga masumpa sa PFP.
Kahapon, ginkumpirmar ni Mayor Treñas nga masumpa sa National Unity Party si Raisa.
Pagkahapon naman, ginpahibalo sang alkalde nga nagbisita sa iya ang mga representatives sang PFP agud hibaluon kun sa diin nga partido masumpa si Raisa.
Una na ginpabutyag sang alkalde nga indi niya pag-ipilit kun alang-alang nga makasumpa si Raisa. Gintumod pa niya nga may “daw nagapamalabag” sa pagsumpa sang iya bata.
