WVATCCI nagdihon sang manifesto nga nagasuporta sa 25% nga numero sang mga jeepney units halin sa first towns nga makasulod sa siyudad sa ginapatuman nga Enhanced LPTRP
Nagdihon sang manifesto ang Western Visayas Alliance of Transport Cooperatives and Corporation, Incorporated nga nagasuporta nga 25% lang sang jeepneys units halin sa first town ang pasudlon sa siyudad, samtang gamiton ang 15% kun magdugok ang mga pasahero sa tiun sang rush hour.
Ginhimo ini sang grupo, pila ka adlaw sang ginsuguran ang full implementation sang Enhanced Local Public Transport Route Plan (ELPTRP).
Base sa manifesto, ginapanindugan sang grupo nga makatuga ang pagpugok sang trapiko kag makaapekto sa turn around sang mga awarded units sang mga city loop jeepneys kun magsobra sa 25% ang units halin sa first towns nga masulod sa siyudad.
GInrason man nila nga daan na ang road networks sa siyudad kag may limitado nga kapasidad gani makatuga sang traffic distortion kag makaapekto sa sa transport service kun madamo nga salakyan ang masulod sa siyudad.
Ginpasiguro man sang alyansa kag mga miyembro nga iduso sa terminal operator nga padayunon ang improvements sa mga terminal para matalunsay ang pagguwa kag pagsulod sang mga units.
Ginpasalig snag grupo ang maayo nga serbisyo ilabe na ang dispatching sang mga units sa terminal kag padulungan sang ruta.
Una na naghingyo ang Iloilo provincial government paagi sa sulat ni Governor Arthur Defensor, Jr. nga 40% sa numero sang mga units halin sa first towns ang makasulod sa siyudad apang wala ini gina-implementar. — via Aksyon Paula Elambayo
