Asawa patay, bana pilason sang nagbungguanay ang 2 ka motorsiklo sa Carles
ILOILO— Dead-on-arrival sa ospital ang 46-anyos nga asawa nga angkas sang motorsiklo sang nabungguan sang isa pa ka motorsiklo sa Brgy. Cawayan, Carles las-10 kahapon sang aga, Hulyo 4.
Suno kay Police Senior Master Sergeant Kristoffer Balaan, imbestigador sang Carles Municipal Police Station, ginsugat sang 47-anyos nga bana ang iya asawa nga nagbaligya sang isda sa Brgy Abong, Carles kag papuli na kun tani sila sang natabu ang aksidente.
Sa imbestigasyon, nagliko pa-wala ang motorsiklo nga ginasakyan sang mag-asawa sang gulpi lang nagbunggo ang nagasunod nga motorsiklo nga ginasakyan sang tatlo ka mga lalaki nga padulong sa Estancia.
Nakaagum sang pilas sa ulo ang asawa nga nangin rason sang iya kamatayon, samtang nabagrasan ang iya nga bana, suno sa police.
Na-ospital naman ang 24-anyos nga driver sang isa pa ka motorsiklo kag may mga bagras man ang angkas niya nga 32-anyos kag 35-anyos.
Lunsay wala sang helmet ang mga involved sa aksidente, suno sa police. — via Aksyon Farrah Mae Morano
