Aksyon Radyo Iloilo news team ginbalabagan nga makasulod sa barangay hall sang Lopez Jaena, Jaro
ILOILO CITY – Ginpunggan sang barangay official sang Lopez Jaena, Jaro nga pasudlon ang reporter sang Aksyon Radyo Iloilo sa sulod sang ila barangay hall.
Nagpadulong ang katapo sang media sa barangay hall agud i-validate ang gin-report sang residente nga litrato ni Executive Assistant Raisa Treñas-Chu ang natapik sa tupad sang litrato nanday Mayor Jerry Treñas kag Vice Mayor Jeffrey Ganzon.
Sa gin-post sang netizen sa Facebook, ginakuwestiyon niya kun nga-a laragway ni Treñas-Chu ang nabutang bisan pa sa naandan, laragway kuntani ni Congresswoman Julienne Baronda ang tupad sang high ranking officials sa syudad.
Sang gin-usisa sang Aksyon Radyo Iloilo news team ang barangay, nagpamalibad ang barangay kagawad nga magpasulod sa barangay hall tungod suno sa iya may instruksyon ang kapitan nila nga siya lang ang maatubang sa katapo sang media.
Naka-leave si Punong Barangay Albert Santiago kag sa Agosto 4 pa mabalik sa syudad.
Nagpamalibad man ang barangay kagawad nga makuhaan sang laragway ang ginakwestiyun sang residente.
Si Treñas-Chu nga bata ni Mayor Treñas ang gina-endorso nga mapadalagan nga kongresista sa Iloilo sa May 2025 midterm elections. Samtang, si Congresswoman Baronda naman ang wala pa sang deklarasyon kun ano ang iya plano sa masunod nga tuig nga eleksyon. — via Aksyon Justice Savannah Pamplona
