5 ka ginapatihan NPA rebels patay sa engkwentro sa Calinog
ILOILO —Patay ang lima ka ginapatihan miyembro sang New People’s Army sa engkwentro sa Brgy. Aglonok, Calinog las-3 kahapon sang hapon, Agosto 8.
Ginkumpirmar ini ni Lt. Colonel J-Jay Javines, spokesperson sang 3rd Infantry Division, Philippine Army.
Lakip sa na-recover ang tatlo ka mga matag-as nga kalibre sang pusil, suno kay Javines.
Tuman ka layo sang lugar nga natabuan sang engkwentro, suno kay Mayor Francisco Calvo.
Paathag sang alkalde, ang Barangay Aglonok ang katapusan nga barangay sang banwa kag boundary na pa-Antique.
Inadlaw pa ang lakton, suno sa alkalde, kun magkadto sa encounter site halin sa barangay proper sang Aglonok tungod nga bukid na ang lugar kag matabok pa sa suba.
MAY BABAYE NGA NAPATAY
Ginkumpirmar ni Mayor Calvo nga may babaye nga lakip sa lima ka napatay.
“Pero waay pa gid nakilala [ang mga napatay] kag taga-diin,” suno kay Mayor Calvo.
Naglupad na kaina sang aga ang chopper sang Philippine Army pakadto sa encounter site agud kuhaon ang mga bangkay kag dal-on sa patag.
UNA NGA MGA ENGKWENTRO
Una nagluntad ang engkwentro sa Barangay Aglonok sang Lunes, Agosto 5, sa diin napatay si Benjamin Cortel alyas Mamang/Amor, nga Political Officer sang Kilusang Rehiyon Panay kag tumandok sang Barangay Cochero, Molo.
Sang Agosto 6, may nagluntad man nga engkwentro sa Barangay Cabatangan, Lambunao. Napatay si Jose Jerry Tacaisan alyas Miller/Bronze nga taga-Barangay Bucari, Leon kag ginatudlo nga miembro sang Regional Headquarters (RHQ) Komiteng Rehiyon-Panay (KRP) kag former squad leader sang nabungkag na nga Southern Panay Front.
