Alyansa sang mga transport cooperatives and corporations ginapanawagan nga himuon nga laye ang PTMP

Suno kay Mr. Rizalito Alido sang transport alliance sa siyudad, kun mahimo na nga laye ang PTMP, mahatagan na sang gobyerno sang separado nga budget ang transport cooperatives agud mas mapasangkad ang transport system sa pungsod.

Kun may separado nga budget ang mga transport cooperatives, makabaton na sang bastante nga subsidy ang mga drivers kag operators.

Mangin fully operational naman ang iban pa nga components sang PTMP tungod mahatagan sang pondo ang operational nga mga galastusan sang mga kooperatiba.

Halimbawa sini ang pagpa-idalum sa training sa mga drivers kag public assistance officers (PAO) sang modernized jeepneys agud mangin mas disiplinado pa sa dalan.

Ginpabutyag man ni Alido nga daku ang mabulig sang tatlo ka pending nga mga house bills sa Committee on Transportation sa Senado may kaangtanan sa ginakampanya sang kongreso nga himuon na nga laye ang Public Transport Modernization Program (PTMP).

Isa na diri ang House Bill 1332 nga ginpasar sang Cooperative-National Confederation of Cooperatives (Coop-NATCCO) Partylist nga nagatuyo i-institutionalize ang anay Public Utility Vehicle Modernization Program (PUVMP).

Nagapati si Alido nga kun i-institutionalize ang PTMP, mas mangin centralized kag naga-angut ang nagkalain-lain nga mga ahensya sang gobyerno nga nalakip sa 10 ka components sang PTMP.

Dugang pa ni Alido, kun mangin laye na ang PTMP, indi na ini masuspender.

Matandaan humalin sang 2017 sang ginpatuman ang PTMP, pito na ka beses na nga gin-suspend ukon gin-extend ang mandatory consolidation nga isa sa mayor sini nga component.

Subong, nagapabilin nga Department Order (DO) ang PTMP santu sa DO no. 2017-011, nga may tinutuyo i-modernize ang transport sector sa pungsod. — via Aksyon Marvin Malificiar