2 dakop sa drug buy bust operation sa City Proper

ILOILO CITY — Naglab-ut sa P489,600 nga balor sang suspected shabu ang na-recover sa drug buy bust operation sa Muelle Loney, City Proper kahapon, Agosto 19.

Suno kay Police Major Roque Gimeno III, hepe sang Police Station 1, ang subject nga si alyas Dodong, 38-anyos ang nagatago sang suspected shabu samtang ang 18-anyos nga si alyas Angel ang nagaserbe nga runner.

Ginabagsak lang kay Dodong ang supply sang illegal drugs kag gina-distribute sa iya mga runner nga nagkaladakpan naman sa drug buy bust operation sang police.

Base sa pagpangusisa sang police, wala nagaguwa agud magdul-ong sang illegal nga druga ang subject kag ginatugyan lang sa iya mga runner.

Ginpabutyag ni Capt Gimeno nga sa mga kaiping man lang nga mga barangays ang parokyano sang subject.

Na-recover ang 20 ka sachets sang suspected shabu nga nagabug-at sang 72grams. — via Aksyon Farrah Mae Morano