Lalaki pilason sang naigo sang bala samtang nagapanamang sa San Miguel, Iloilo
ILOILO – Imbestigaran sang mga pulis kun diin naghalin ang mga lupok sang pusil antes naigo sang bala ang 22 anyos nga lalaki nga nagapanamang sa Brgy. San Jose, San Miguel sang Biyernes, sang gab-i, Agosto 30.
Suno kay PMAJ Richard Lao, hepe sang San Miguel MPS, may nag-report sa ila mg alas-9:30 kagab-i nga may shooting incident. Sa ila pagpangusisa, “stray” bullet ang nag-igo sa biktima pero gina-imbestigaran nila kun diin naghalin ang mga lupok.
Napilasan sa alatrasan kag wala nga paa ang biktima pero nakaguwa na sa ospital matapos ginbulong sa Aleosan District Hospital, suno kay Major Lao.
Lakip sa gina-imbestigaran sang police kun ang biktima gid kag iya mga kaupod ang gintuyo nga tiruhon.
May mga impormasyon nga posible nasal-an nga kawatan ang biktima tungod nga nagatiid sila kag nagapang-flashlight sa kawayanan kag kalubihan samtang nagapangita sang damang.
Ginpabutyag ni Lao nga “mabudlay man maghimo sang statement nga indi naton ma-support.”
Magahimo suno kay Lao sang imbestigasyon ang ila unit, kag ma-conduct man sang parallel investigation ang Iloilo Police Provincial Office.
“Taud-taudon ta ang aton findings kun diin naghalin ang pagpalupok [para makilala kun sin-o ang nagpalupok],” suno kay Major Lao.
