1 patay, 1 pilason sang nagbungguanay ang 2 ka motorsiklo sa Pavia
ILOILO — Isa patay samtang isa pilason sang nagbungguanay ang duha ka mga motorsiklo sa Barangay Jibao-an, Pavia mga pasado la-1 kahapon sang kaagahon, Setyembre 8.
Suno kay Police Staff Seargent Crissande Maquiling, imbestigador sang Pavia Municipal Police Station, nag-u turn tungod papuli sa San Miguel ang driver sang motorsiklo nga si Stephen Siga-an sang nagbungguanay ang ila motorsiklo ni Dionard Malones nga papuli na sa Iloilo City.
Sa imbestigasyon sang police, posible madasig ang dalagan sang motorsiklo ni Malones. Madulom naman ang lugar sang natabu ang insidente.
Lunsay nagasuksok sang helmet ang duha ka mga drivers pero posible nagtabog ang kay Malones tungod sa impact suno kay Maquiling.
Napatay samtang ginabulong sa Western Visayas Medical Center (WVMC) si Malones nga nakaagum sang head injury samtang pagpalanakit sang lawas naman ang ginabatyag ni Siga-an nga gindala sa Western Visayas Sanitarium and General Hospital. — via Aksyon Maria Kayla Tingzon
