Former Iloilo City Mayor Jed Patrick Mabilog nakabalik na sa Pilipinas
Balik Pilipinas na si former Iloilo City Mayor Jerry Treñas kahapon makaligad ang pito ka tuig nga pagtenir sa abroad.
Ini ang ginkumpirmar ni Mr. Ariel Castañeda, suod nga abyan sang anay alkalde nga nagbulig patigayon sa iya pagpauli.
Gilayon suno sa iya nga nag-surrender sa National Bureau of Investigation (NBI) si Mabilog pag-abot niya sa pungsod apang gin-release man sa custody sang NBI-Capital Region Detention Facility sang nagpiyansa sang P90,000.
Ang piyansa may kaangtanan sa gindagdag nga arrest warrant batok kay Mabilog sang Lapu-Lapu City RTC 73 kag Sandiganbayan Third Division tungod sa paglapas sa “Code of Conduct ang Ethical Standards for Public Officials and Employees” kag Anti-Graft and Corrupt Practices Act” tungod sa clamping and towing contract sang Iloilo City sang alkalde pa si Mabilog.
2017 sang nagbiya sa Pilipinas si Mabilog tungod sa kahadlok sa iya kabuhi sang gin-angut ni former President Rodrigo Duterte sa illegal drug trade.
Nagpadulong ang pamilya ni Mabilog sa Japan para sa iya speaking engagement apang wala na nagbalik tubtob nga nagdiretso sa USA sa diin sila nagpangayo sang political asylum.
Sa interview sang ABS-CBN New Channel (ANC), ginpabutyag ni Mabilog nga luyag niya magbalik sa Pilipinas ilabe na sa Iloilo City agud mabisita ang lulubngan sang iya iloy nga napatay samtang yara siya sa abroad.
Handa man si Mabilog nga mag-atubang sa imbestigasyon sang House Quad Committee kun imbitaron siya agud klaruhon ang iya ngalan nga gindalahig sa illegal drugs sang panahon ni Duterte.
Nagtuhaw ang ngalan ni Mabilog makaligad ginmensyonar ni Iloilo City Rep. Julienne “Jam-Jam” Baronda ang anay alkalde sa Quad-Com hearing.
