Driver patay sang nadanlog kag nahulog sa kanal ang ginamaneho nga motorsiklo sa San Joaquin

ILOILO— Patay ang driver sang motorsiklo sang na-aksidente sa Barangay Cata-an, San Joaquin, sang Septiyembre 24 sang gab-i.

Suno kay Police Lieutenant Jhonrey Laru-an, deputy chief of police sang San Joaquin Municipal Police Station, halin sa ila balay ang 50-anyos nga lalaki sakay sa iya motorsiklo kag padulong kun tani sa proper sang amo nga barangay.

Sa imbestigasyon sang police, nadulaan sang kontrol sa pagmaneho ang driver tungod sang madanlog nga dalan kag nahulog sa kanal ang motorsiklo.

Wala sang suksok nga helmet ang lalaki gani nakaagom sang pilas sa ulo nga nakalampos sa kilid, suno sa police.

Ginhingagaw pa dala sa ospital ang driver pero gindeklarar nga dead-on-arrival tungod sang patal nga pilas sa ulo. — Aksyon Farrah Mae Morano