Mag-live in dakop sa drug buy bust operation sa Lapuz
ILOILO CITY — Arestado ang mag-live in partner sa drug buy bust operation sa Blk 3, Brgy. Sinikway, Lapuz kagab-i, Setyembre 26.
Nadakpan kanday Jason Gimoto, 45-anyos, kag Sheran Dalipe, 46-anyos.
Suno kay Police Captain Lester Oliveros, hepe sang Police Station 8, antes pa nag-board ang duha sa Blk 3, na-monitor na ang ila aktibidad sang yara pa sila sa Blk 10 sang amo nga barangay.
Ginpabutyag sang police nga nagsaylo sang boarding house ang duha tungod namutikan nila nga gina-monitor sila sang otoridad.
Base sa pagpangusisa sang police, nagkalain-lain nga tawo ang nagasulod sa boarding house sang duha kag posible ginadul-ong lang ang illegal drugs.
Nagatrabaho sa luwas sang pungsod ang babaye kag nagbakasyon lang samtang wala sang trabaho ang lalaki, suno sa police.
Apat ka sachets sang suspected shabu nga nagabug-at sang 13 grams kag may standard drug price nga P88,400 ang nakuha sa duha. — via Aksyon Farrah Mae Morano
