Balay nasunog sa Tacas, Jaro

ILOILO CITY — Nasunog ang isa ka balay sa Zone 3 Brgy. Tacas, Jaro pasado las-3 sang hapon, Setyembre 26.

Ginapanag-iyahan sang pamilya Julleza ang balay nga nasunog.

Suno kay Remedios Julleza, iloy sang apat ka mag-ululutod nga nagalumon sa isa ka balay, nagabaligya siya sang streetfoods sa guwa sang nabal-an nga nagakasunog na ang ila balay.

Sa panaysayon sang iloy, itom nga aso sa ikaduha nga panalgan sang balay ang una niya nga nakita kag ulihi na nakita ang kalayo sa idalum nga porsyon.

Tatlo ka bata ang nagakatulog sa ikaduha nga panalgan sang balay pero nakaguwa sang naglumpat sa terrace.

Sa record sang Bureau of Fire Protection, las-3:40 nabaton ang fire call nga gindeklarar sa first alarm las-3:46 kag second alarm las-3:55 sang hapon.

Gindeklarar naman nga under control ang sunog las-4:19 sang hapon. — via Aksyon Paula Elambayo