Mag-asawa nakuhaan sang P300K nga balor sang suspected shabu sa drug buy bust sa Molo

ILOILO CITY- Nakuhaan sang P387, 600 nga balor sang suspected shabu ang mag-asawa sa drug buy bust operation sa Zone 8 Brgy. Calumpang, Molo kahapon, Setyembre 26.

Ginkilala ang mag-asawa kanday Rober kag Jomalyn Pahunao, lunsay ginakabig sang police nga high value drug personality.

Suno kay PCapt. Ryan Christ Inot, team leader sang City Drug Enforcement Unit, masobra isa ka semana nga gin-monitor ang mag-asawa tubtob nga nadakpan.

Dugang pa niya, may mga utod si Rober nga na-preso sa Muntinlupa City may kaangtanan sa illegal drugs. Nagahalin man ang supply sang illegal drugs sa amo nga lugar suno sa police.

Sa operasyon sang police, na-recover ang walo ka sachets sang suspected shabu sa mga subject nga nagabug-at sang 57 grams.

Preso sa Molo police station ang mga subject. — via Aksyon Paula Elambayo