Anay preso dakop sa drug buy bust operation sa City Proper
ILOILO CITY — Balik presuhan ang 59-anyos nga lalaki sang liwat nga nadakpan sa drug buy bust operation sa Veterans Village, City Proper kahapon, Oktubre 2.
Ginkilala ang subject kay Jorge Locsin nga residente sang amo man nga barangay.
Suno kay Police Captain Roque Gimeno III, hepe sang Police Station 1, may mga nanotisyaran ang pumuluyo nga lain-lain nga tawo nga nagasulod sa balay sang subject.
Sa pagpangusisa sang police, Lunes ukon Martes ginabagsak kay Locsin ang supply sang illegal drugs sang tawo nga ka-edad man niya, kag gina-distribute sang subject sa iban pa gid nga mga durugista.
Sa amo man nga barangay nagahalin ang supply sang illegal drugs sang subject, kag gina-follow up na sang pulis.
Yara sa Barangay Anti-Drug Abuse Council (BADAC) list si Locsin. Nadakpan na siya sang 2015 nga nagbaligya sang illegal drugs sang nakaguwa sa presuhan sang 2019 liwat siya nga nag-engage sa illegal activities.
Na-recover ang 15 ka sachets sang suspected shabu nga nagabug-at sang 66grams kag may standard drug price nga P448,000. — via Aksyon Farrah Mae Morano
