P7.4 million nga balor sang suspected shabu na-recover sa mag-live in partner sa Oton
Na-recover ang P7.4 million nga balor sang suspected shabu sa mag-live in partner sa Brgy. Cabanbanan, Oton, la-1 kahapon sang kaagahon.
Suno kay Police Captain Glenn Soliman, head sang Regional Police Drug Enforcement Unit (RPDEU), nadakpan kanday alyas Magelyn, 32-anyos nga tumandok sang Brgy. San Marcos, San Pablo City, Laguna, kag Andrew, 32-anyos sang Brgy. East Timawa, Molo.
Naga-arkila lang sang balay sa Oton ang mag-live in partner.
Sa pagpangusisa sang police, ang babaye ang may contact sa iya boss sa Metro Manila nga nagapadala sang supply sang illegal drugs.
Gina-pick up lang sang babaye sa banwa sang Oton ang package nga ginapadala paagi sa bus, suno sa police.
Gina-repack sang babaye ang illegal drugs kag nagabulig man ang iya nga live-in partner.
Na-recover ang ginabanta isa ka kilo sang suspected shabu nga may standard drug price nga P7,400,000.
Ginalantaw sang police nga hungod nga nagkadto kag nagtiner sa Iloilo ang babaye para lang mag-distribute sang illegal nga druga halin sa iya nga boss.
Masobra pa lang isa ka tuig sa Iloilo ang babaye, samtang sang Abril lang nag-board sa Oton, suno sa police. — via Aksyon Farrah Mae Morano
