Bana patay sang ginlampusan sang improvised nga dumbbell sang iya asawa sa Zarraga

ILOILO — Patay ang bana sang ginlampusan sang iya asawa sang improvised nga dumbbell samtang nagahigda sa sofa sa ila balay sa Saintsville Subdivision, Poblacion Ilawod, Zarraga mga las-11 kaina sang aga.

Suno kay Police Executive Master Seargent Jeffrey Sirue, imbestigador sang Zarraga Municipal Police Station, nag-ako ang asawa nga si alyas Maria, ginabanta 60-anyos nga retired teacher nga ginlampusan niya sang makapila ka beses sa ulo ang iya bana nga si alyas Nardo, engineer nga naga-obra sadtu sa Saudi Arabia.

Ginpabutyag sang asawa suno sa police nga may naghutik sa iya gani nahimo ang krimen.

Wala nag-away ang mag-asawa antes natabu ang insidente, suno sa police kag wala man sang nabatian nga gahod ang mga pumuluyo sa palibot.

Sa pagpangusisa sang police, ginabanta sa 4-5 ka bulan pa lang nga nakapauli halin sa abroad ang bana.

Ginabanta 1.5 kilograms ang kabug-aton sang dumbbell, suno kay Sirue. Ginapanag-iyahan sang kabulig sa balay sang mag-asawa ang dumbbell nga iya ginhimo nga human sa lata kag semento.

Yara na sa kustodiya sang Zarraga Police ang asawa samtang sa morgue sang Iloilo Provincial Hospital sa Pototan ang bana. — via Aksyon Maria Kayla Tingzon