16 nga solterito nga gin-report missing sang nalumos sang naglangoy sa suba sa Janiuay patay na sang nakita

ILOILO — Patay na sang nakita na subong nga aga ang 16-anyos nga solterito nga gin-report na-missing sang naglangoy sa suba sa Brgy. Caranas, Janiuay las-3 Domingo sang hapon.

Suno kay Police Captain Hector Ayagan, hepe sang Janiuay Municipal Police Station, nakita sa suba sa Tolarucan, Janiuay ang solterito.

Ginkumpirmar man sang iloy ang identity sang solterito.

Domingo sang hapon, Oktubre 20, sang nag-inum inom ang pito ka magbarkada sa kilid sang suba pero gin-report nga nadula ang solterito las-11:45 sang gab-i.

Sa pagpangusisa sang police, pagkatapos nag-inum inom ang magbarkada, nag-una pauli ang apat samtang nagpabilin ang tatlo.

Naglangoy sa suba ang tatlo, pero ginsaway ang solterito nga indi na magpadayon sa paglangoy tungod nakainom na siya.

May porsyon sang suba nga madalom suno sa police.

Kagab-i, nag-conduct sang search and rescue operations ang Janiuay Municipal Disaster Risk Reduction and Management Office pero wala gid nakita ang solterito. — via Aksyon Maria Kayla Tingzon