4 ka suspek sa pagpatay kay John Chris Mark Gapol napasakaan na sang kaso
ILOILO CITY — Napasakaan na sang kaso ang apat ka mga suspect sa pagpatay kay John Chris Mark Gapol sa Brgy. Taal, Molo sang Nobyembre 19.
Suno Police Captain Ryan Christ Inot, officer in charge sang Molo Police Station, murder ang ginpasaka nga kaso batuk kanday alyas Makoy, 16-anyos kag Ryan Kent Magbanua, 25-anyos nga amo ang nag-set up kay Gapol.
May duha man ka John Does ukon wala pa makilal-an nga indibidwal nga may partisipasyon man sa krimen ang lakip sa ginkasuhan. Suno kay Inot, ini ang riding-in-tandem nga nagtiro sa biktima nga at large gihapon.
Preso sa Molo Police Station si Magbanua samtang yara sa kustodiya sang Balay Dalayunan sa La Puz si Makoy tungod menor de edad.
Sa imbestigasyon sang Molo police, may daku nga utang sa illegal nga druga si Gapol kay Magbanua sa diin nag-ugat ang krimen. — via Aksyon Maria Kayla Tingzon
