Lalaki patay sang nasaputihan sang upod sa ilimnan sa Dumangas

ILOILO — Patay ang 34-anyos nga lalaki sang ginsapote sang mga kaupod sa ilimnan sa Brgy. Pulao, Dumangas kahapon sang kaagahon, Enero 1.

Suno kay Police Staff Sergeant Jay Dugayo, imbestigador sang Dumangas Municipal Police Station, pasado las-7:30 na kahapon sang aga na-report sa police ang natabo.

Sa imbestigasyon sang police, nag-inum inom ang biktima kaupod ang mga suspek sa balay sang iya tiyo sa pagsug-alaw sang Bag-ong Tuig.

Ginpahayag sang police nga may pagbinaisay nga natabo sa tunga sang biktima kag mga suspek.

Pagkatapos sang pagbinaisay, naglakat ang biktima kag ginsundan sang mga suspek base sa nakakita.

Pasado las-5:30 kahapon sang kaagahon sang gindala pabalik sang mga suspek ang biktima sa balay sang iya tiyo. Natingala ang pamilya nga wala na siya nagaginhawa kag nagtawag sa police.

May mga lagub sa lawas ang lalaki suno sa nakita.

Ipaidalum sa autopsy ang bangkay sang lalaki agud mahibaluan ang gintunaan sang iya kamatayon. — Aksyon Maria Kayla Tingzon