Dismissed nga pulis isa sa apat ka mga suspek sa pagpanghold-up sa Sta. Fe, Capiz sa diin nataban ang P3.1 million nga cash; salakyan nga gingamit sang mga suspek na-recover sa Dingle
Ginkumpirmar ni Capiz Police Provincial Office Director Police Colonel Albert Tapulao nga dismissed police ang isa sa apat ka mga suspetsado nga nagpanghold-up sa Sta. Fe, Pilar, Capiz sang Domingo, Enero 5.
Suno kay Tapulao, kabahin sa gina-imbestigaran sang kapulisan ang anggulo nga inside job ukon may nagtimbre halin sa kompaniya kag natun-an ang ruta sang mga biktima nga empleyado sang beverage company.
Na-recover sa Brgy. Moroboro, Dingle ang salakyan nga gingamit sang mga suspek sa pagpanghold-up.
Suno kay Police Captain Alwyn Salmon, officer-in-charge sang Dingle Municipal Police Station, na-capture sang CCTV sa crime scene ang plate number sang salakyan gani gin-check sa records sang Land Transportation Office 6 kag nahibaluan nga residente sang Camiri, San Enrique ang tag-iya.
Sang ginkadtuan sang police, wala ang tag-iya pero may nakahambal sa ila nga may balay man sa Dingle ang tag-iya gani ginkadtuan kag didto nakita ang salakyan, mga las 11:52 kahapon sang aga.
Sa pagpangusisa sang police sa tag-iya, naglisensiya ang iya bayaw sang Sabado sang hapon nga hulamon ang salakyan.
Domingo sang aga, pagbugtaw sang tag-iya wala na ang salakyan kag nagdumdom nga ang iya bayaw ang nagkuha.
Pagka-hapon, ginbalik sang bayaw sa tag-iya ang salakyan. Gindala sang police ang salakyan sa Pilar, Capiz samtang gin-imbitar ang tag-iya sang salakyan agud ma-interview.
Una nga ginpahayag ni Police Colonel Tapulao, nga nagpakuno-kuno nga miyembro sang PNP- Criminal Investigation and Detection Group ang tatlo ka mga suspek, gin-flagdown ang salakyan nga ginasakyan sang mga biktima kag ginhambalan nga may illegal drugs sila nga karga.
Pero sang gin-search sang mga suspect ang salakyan, ginkuha nila ang P3.1 million nga cash, tatlo ka cheke nga nagabalor P1.3 million; 157,000; kag P39,000.
DUHA KA SUSPEK NADAKPAN
Duha ka suspek ang na-aresto na sang Capiz police nga naghold-up sa salakyan sa Brgy. Pilar, Capiz.
Suno kay PCol. Tapulao, positibo nga na-identify sang mga biktima kag sang witness ang duha.
Ginkilala ang isa sa mga na-aresto kay John Francis Daquilaña nga amo ang bayaw sang tag-iya sang salakyan nga na-recover sa Dingle. Arestado man ang tiya sang suspek nga ginalantaw nag-drive sang getaway vehicle.
Suno kay Tapulao, ginpakita sa mga biktima kag witness ang litrato sang mga suspek sa rogue’s gallery rason nga na-identify. — Aksyon Maria Kayla Tingzon
