Amay nga CAFGU patay sang natiruhan sang 17-anyos nga bata sa Bingawan

ILOILO — Dead-on-arrival sa ospital ang amay nga miyembro sang Citizen Armed Force Geographical Unit (CAFGU) sang natiruhan sang iya 17-anyos nga bata nga lalaki sa Barangay Malitbog, Bingawan las-7 kahapon sang aga.

Suno kay Police Lieutenant Colonel Philip Girao, hepe sang Bingawan Municipal Police Station, may indi pag-intiendihanay ang duha kag napatup-an sang amay ang iya bata, duha ka adlaw ang nagligad.

Sa pagpangusisa sang police, indi mapat-ud sang iloy kun ano ang gin-awayan sang mag-amay kag wala man sang nasugid ang ila nga bata.

Una nga na-igo sa iya likod ang amay sang gintiro sang bata kag liwat nga napilasan sa dughan sang nag-atubang, suno sa police.

Na-recover ang .38 revolver kag duha ka basiyo sang amo man nga kalibre sang pusil.

Nag-request na ang kapulisan sang firearm verification agud mahibaluan kun rehistrado ang pusil nga na-recover.

Yara na sa kustodiya sang Municipal Social Welfare and Development Office ang bata. — Aksyon Maria Kayla Tingzon