Lalaki patay sang gintiro sang anay-live in partner sang iya karelasyon sa Lanag, Santa Barbara; suspek nagapabilin nga at large

ILOILO — Pagpangimon ang ginasundan nga anggulo sa pagpatay sa 45-anyos nga lalaki sang gintiro sang anay live-in partner sang iya karelasyon sa Sitio Riles, Barangay Lanag, Sta. Barbara kahapon, Pebrero 4.

Ginkilala ang biktima kay Rodito Celiz, Jr., tumandok sang Brgy. Omambog, Sta. Barbara, samtang suspek si Ronald Susbilla sang Brgy. Dalid, Sta. Barbara.

Isa pa lang ka semana nga nagatiner si Celiz sa balay sang iya nobya nga si Alyas Maymay nga tumandok sang Brgy. Lanag.

Antes sang ila relasyon, lima ka tuig naman ang relasyon nanday Susbilla kag Maymay kag may lima sila ka tuig nga bata nga babaye nga yara sa poder sang iloy.

Ginsaysay ni Alyas Nene, bata ni Maymay, sang nag-abot si Susbilla sa ila balay pasado la-una kahapon sang hapon, wala man sila sang may ginbaisan ni Celiz.

Si Celiz nagahigda sa katre nga yara sa sala sang balay. Samtang naga-istorya, hinali lang suno sa iya, nga gintiro sang suspek ang biktima sang makaduha ka beses pero wala maigu.

Nagbangon sa katre ang biktima kag nagpalagyo pero nakadasma sa gate rason nga gintiro liwat sang suspek kag naigu sa likod.

Sang yara na sa guwa sang balay, liwat pa gid nga gintiro ni Susbilla si Celiz. Suno naman sa mga residente sa palibot, naghulam sang motorsiklo si Celiz agud magpalagyo padulong sa national highway samtang ginalagas ni Susbilla nga nagasakay man sa motorsiklo.

Sa higad sang highway na gin-finishing sang suspek ang biktima antes nagpalagyo. Gindala pa sa ospital si Celiz pero gindeklarar nga napatay tungod sa patal nga pilas sa dughan kag liog.

Sa impormasyon halin sa Sta. Barbara police, may walo ka igu sang pagkatiro ang biktima.