Seaman pilason sang gin-strafing sang barangay kagawad ang ila balay sa Lambunao

ILOILO — Estable na ang kondisyon sang seaman nga natiruhan sang kagawad sa Barangay Misi, Lambunao kaina sang kaagahon.

Suno kay Police Staff Sergeant Risan Larroza, gin-operahan ang biktima nga si Mateo Darroca, 46-anyos nga nakaagum sang pilas sa wala nga paa.

Nagaguwa sa imbestigasyon sang police nga nasumbagan ni Darroca ang suspect nga si Arcel Gallega, 44-anyos tungod naka-inom.

Gintambagan man sila sang iban pa nga naga-inom kag sang iban nga mga barangay kagawad.

Pagkatapos natambagan, gindul-ong ang mga involved sa ila mga balay.

Pero nagbalik si Gallega nga may dala nga pusil kag ginpalukpan ang balay ni Darroca.

Tatlo ka lupok ang nabatian sa lugar sa diin may tatlo ka basiyo sang bala ang nakuha.

Preso si Gallega kag pasakaan sang kaso nga illegal possession of firearm kag paglapas sa Comelec gun ban.

NA-IMPITO

Na-impito ang barangay kagawad gani nahimo niya ang pagpangtiro.

Suno kay Gallega, naglabay siya sa tiyangge sa diin naga-inom ang seaman nga si Darroca upod sa iya mga abyan kag hinablos sang ginhagad siya nga ma-inom.

Pagpungko ni Gallega, wala na sang sabtanay kag gulpi lang siya ginsumbag ni Darroca sa baba.

Tungod na-impito, nagkuha sang pusil si Gallega kag nagkadto sa balay ni Darroca.

Gin-ako ni Gallega nga siya ang una nagpalupok pero may nagbalos suno sa iya sa pagpalupok halin sa sulod sang balay ni Darroca.

Na-recover sa lugar ang Armscor long barrel 12-gauge shot gun, tatlo ka basiyo sang bala kag mga balines.

Ginpabutyag man sang kagawad nga ginbakal niya ang pusil sang nagligad nga tuig agud gamiton bilang self-defense. — Aksyon Maria Kayla Tingzon