P7.5 million nga balor sang suspected shabu na-recover sa Regional Top-Listed Drug Personality sa Calumpang, Molo
ILOILO CITY — Malapit 7.5 million pesos nga balor sang suspected shabu angt na-recover sa drug buy bust operation sa Brgy. Calumpang, Molo kahapon, Marso 4.
Nadakpan sang City Drug Enforcement Unit sang Iloilo City Police Office kanday Alyas Ariane, lalaki, 48-anyos sang Zone 2, Brgy. Bakhaw, Mandurriao nga regional top-listed drug personality kag security guard nga si Alyas Toto, 32-anyos sang Brgy. Dacuton, Dumarao, Capiz.
Na-recover sang CDEU ang 39 ka sachets kag apat ka dalagku nga putos sang suspected shabu nga nagabug-at sang 1,100 grams.
Suno kay Police Captain Ryan Christ Inot, chief sang CDEU, isa si Ariane sa mga ginakabig nga daku nga source sang illegal nga druga sa rehiyon.
Nagaguwa suno sa iya, ang ngalan ni Ariane sa iban nga mga nadakpan nga subjects sa anti-drug operations rason nga gin-monitor siya sang mga otoridad.
Gin-ako ni Inot nga nabudlayan pa sila sa pag-operate sa subject tungod madasig nga makamutik sa mga transaksyon sang otoridad kag ginpahayag may mga body guards. Preso sa Molo Police Station ang duha ka nadakpan.
Kabahin sang masangkad nga kampanya kontra illegal nga druga ang pagkadakup sa regional top-listed drug personality kag kaupod nga security guard sa Molo.
Gindayaw ni Iloilo City Police Office ukon ICPO Director Police Colonel Kim Legada ang mga operatiba tungod sa dedikasyon kag stratehiya sa paghimo sang anti-drug operation rason nga nadakpan ang duha.
Ginpasiguro niya nga magasige-sige sa pagtinguha ang kapulisan agud matapna ang pagduging sang illegal nga druga sa siyudad.
