Trabaho, personal nga atrsado ginatudlo motibo sa pagpatay sa senior citizen sa Passi City

Trabaho bilang caretaker sang duta kag personal nga atraso ang ginalantaw sang police nga posible nga motibo sa pagpatay sa senior citizen sa Barangay Poblacion, Passi City kahapon, Marso 20.

Ginkilala ang biktima kay Roger Pelatan, 61-anyos nga residente sang amo nga barangay.

Suno kay Police Lieutenant Colonel Benjo Clarite, hepe sang Passi City Police Station, may pila ka blotter reports may kaangtanan sa pagpakudal kag iban pa nga issues sa duta sa diin gina-reklamo ang biktima nga naka-log sa barangay.

Dugang ni Clarite, gina-verify pa kun ang blotter reports nga maangut sa duta sa diin siya ang caretaker ukon personal nga involvement sang biktima.

Ginpabutyag man niya nga may persons of interest na sila kag padayon nga ginasundan ang mga posible gin-agyan sang mga suspects sa pagpalagyo.

Na-recover sa crime scene ang tatlo ka basiyo kag duha ka slug sang caliber 45 nga pusil.

Apat ka lupok sang pusil ang nabati-an sang mga tawo sa palibot suno kay Clarite.

Sa pag-imbestigar sang police, nakita nga may tag-duha ka pilas sa magtimbang nga abaga ang biktima. — Aksyon Maria Kayla Tingzon