Delivery van driver nag-report nga gin-hold up sa Tubungan kag nakuhaan sang ginabanta P50,000
ILOILO — Gina-imbestigaran pa sang Tubungan police ang report nga gin-hold-up sang duha ka suspek ang driver kag pahinante sang delivery van sa Brgy. Teniente Benito, Tubungan kahapon, Abril 3.
Suno kay Police Captain Alberto Mangilimotan, Jr., officer-in-charge sang Tubungan Municipal Police Station, pasado las-12 sang udto sang nakabaton sila sang tawag halin sa Leon police kag nagpahibalo nga may ginhold-up sa ila area.
Halin sa Tubungan kag padulong sa Leon ang delivery van sang natabo ang ginpahayag pagpanghold-up.
Tungod sa kakulba sang driver, nagdiretso siya sa Leon Police Station kag nag-report.
Nag-coordinate ang Tubungan police sa Leon police kag ginkadtuan ang lugar kon diin natabo ang gina-alegar pagpanghold-up.
Base sa pagpangusisa sang police sa mga biktima, gulpi may nagguwa nga duha ka lalaki sa dalan halin sa kakahuyan kag nagpapara sa delivery van, kag gintayaan sang pusil ang driver.
Ginhatag sang driver ang bag nga may unod nga ginabanta P50,000 nga kuwarta.
Padayon ang imbestigasyon sang mga pulis sa natabo. — Aksyon Paula Elambayo
