3 arestado sang gin-operate sang CIDG ang illegal refilling station sang butane canisters sa Tabuc Suba, Jaro

ILOILO CITY— Siento singkwenta (150) ka butane canisters ang na-recover sang Criminal Investigation and Detection Group (CIDG) Iloilo City sang gin-operate ang indi otorisado nga baligyaan sa Tabuc Suba, Jaro.

Tatlo ang arestado nga naabtan nga naga-refill sang butane canister halin sa Liquefied Petroleum Gas (LPG) tank.

Ang mga arestado amo kanday Leopoldo, Leo Paulo, kag Jayson.

Suno kay Police Executive Master Sergeant Rex Himodo, deputy sang CIDG Iloilo City, tatlo ka adlaw ang ila monitoring antes nila gin-conduct ang buy bust operation.

Sa pagpaathag ni Himodo, ginlapas sang mga nadakpan ang Republic Act No. 11592 ukon LPG Industry Regulation Act.

Dugang ni Himodo, sa balay ginahimo sang mga nadakpan ang pag-refill sang butane canister.

Sa ginhimo nga buy bust, nakit-an sang mga operatiba ang proseso sang pag-refill nga delikado kag posible halinan sang sunog.

Magluwas sa mga butane canisters, na-recover man ang 20 ka LPG tanks nga may kabug-aton sang tag-11 kilos.

Nagabalor sang P60,000 ang na-recover sang CIDG nga butane canisters kag LPG tanks.