ILOILO — Patay na sang nasapwan ang 50-anyos nga lalaki sa Barangay Libot, Calinog las-8:30 kaina sang aga.
Suno kay Police Major Myles Dieron, hepe sang Calinog Municipal Police Station, nagapamukas sang talyer ang mekaniko sang nakita niya ang lalaki nga ginkilala kay Jonathan Cerbas nga taga-Tapaz, Capiz, nga nagahigda sa sulod sang angkar-angkar kag nagabura ang baba.
Sa pagpangusisa sang police sa nakakita, wala siya sang nabati-an nga komosyon kagab-i ukon kaina sang kaagahon.
Ginpahayag man ni Dieron nga wala sang pilas pero may mga lagob sa lawaa ang lalaki sang ila ginlantaw ang lawas.
Nagapati ang pamilya nga tungod sa gutom kag kahulugbon napatay ang ila himata kag wala sang foulplay suno kay Dieron.
Ginpabutyag man sang pamilya nga pala-inom ang ila himata kag may deperensiya sa paminsaron.
Wala na sang plano ang pamilya nga ipa-autopsy ang lawas sang ila himata. — Aksyon Maria Kayla Tingzon
