ILOILO CITY — Naga-pot session pa ang anum ka mag-abyan sang nadakpan sa drug buy bust operation sang Regional Police Drug Enforcement Unit sa Happy Homes Subdivision Brgy. Oñate De Leon, Mandurriao kahapon sang kaagahon, Agosto 22,
Sa monitoring sang police, duha ka semana gin-monitor ang mga illegal nga aktibidad sang mga subject.
Ginpahayag sang police nga nagahalin ang supply sang illegal drugs sang mga subject sa Roxas, Capiz kag Manila kag ginabaligya sa mga lugar sa Region 6.
Sa anum ka nadakpan, lima ang ginakabig sang police nga high value drug personality kag isa ang street level drug personality.
Maid-id nga imbestigaran sang Regional Police Drug Enforcement Unit (RDPEU) ang aktibidad sang anum ka mag-abyan.
Suno kay Police Lieutenant Colonel Alain Licdan, head sang RPDEU, ginalantaw nga posible may gintukod nga grupo sa tagsa ka lugar ang mga nadakpan agud mahimo ang illegal nga aktibidad.
Base sa monitoring sang police, “online” ang transaksyon sang illegal drugs sang mga subject sa ila mga customers. Magluwas diri, may mga ginasugo man ang mga subject nga mag-deliver sang illegal items.– Aksyon Paula Elambayo
