ILOILO — Patay ang walo ka bulan nga lapsag samtang pito ang pilason sang nagbungguanay ang tricycle kag motorsiklo sa Brgy. Sulangan, Dumangas las 6:30 kaina sang aga.
Pakadto sa Dumangas town proper ang tricycle nga may sakay nga anum ka pasahero sang nasumalang ang motorsiklo nga ginamaneho sang 15-anyos nga solterito.
Suno kay Police Master Sergeant Kim John Banzon, chief investigator sang Dumangas Municipal Police Station, nadulaan sang kontrol sa manibela ang solterito gani natumba kag nagtabog sa pihak nga karsada.
Tungod sini, nakabunggo ang sumalang nga tricycle sa motorsiklo kag nagbaliskad.
Tungod sa impact, nagtabog ang mga pasahero lakip ang walo ka bulan nga lapsag kag ang driver sang tricycle.
Gilayon nga gindala sa ospital ang mga pilason pero gindeklarar nga dead-on-arrival ang lapsag tungod sa patal nga pilas sa ulo.
Ginpahayag sang police nga madasig ang pagpadalagan sang driver sang motorsiklo nga wala sang suksok nga helmet.
Desidido nga magpasaka sang kaso ang pamilya sang lapsag sa solterito nga driver sang motorsiklo.
Yara sa kustodiya sang Dumangas Municipal Social Welfare and Development Office (MSWDO) ang solterito nga driver sang motorsiklo. — Aksyon Paula Elambayo/ARI trainee reporter Robert Nietes
