ILOILO — Pilason ang 31-anyos nga dispatcher sang ginbuno sang konduktor sang jeep sa Brgy. Tacas, Miagao pasado las-9:00 kahapon sang aga, Hulyo 14.
Ginkilala ang biktima kay alyas Neth, dispatcher sang jeep kag residente sang Brgy. Calampitao, Guimbal samtang ang suspek ginkilala kay alyas Biboy, 26-anyos nga residente sang Brgy. Tiolas, San Joaquin.
Suno kay Police Major Richard Lao, officer-in-charge sang Miagao Municipal Police Station, ginsumbag sang biktima ang suspek pag-abot sa plaza sang Miagao.
Nagpukutay ang duha tubtob nga nagkuha sang kutsilyo ang suspek kag ginbuno ang biktima.
Naigo sa wala nga butkon ang biktima nga gindala sa ospital kag estable na ang kondisyon.
Sa pagpangusisa sang police, sang Domingo nagbaisay ang duha sa Mohon Terminal tungod sa agaway sa pasahero kag ginpahayag nga naghambal ang biktima sa suspek nga, “Andaman mo lang buwas.”
Na-recover sa suspek ang kutsilyo nga nagalaba sang 10 inches.
Detained sa Miagao Police Station ang suspek. — Aksyon Paula Elambayo
