Inmate sa BJMP-Ungka, ginpahayag nga napatay bangud sa balatian

Jaro, Iloilo City–Balatian ang ginpahayag nga rason sang kamatayon sang preso nga si Rizalino Villanueva alyas Litik sang Barangay Fajardo, Jaro kahapon.

Nagapati si Jail C/Insp. Vicente Papilera, OIC Warden sang BJMP District Jail sa Ungka, Jaro nga wala sang foul play sa kamatayon sang inmate bangud wala sang nakita nga patimaan nga ginpatay ini. Gab-i pa lang sang Hulyo 28 nagreklamo na si Villanueva nga malain ang iya pamatyag kag masakit ang iya lawas. Nakatambong pa ini sang morning meeting sang mga preso kahapon apang nagkadto sa clinic agud magpangayo sang bulong sa sakit sang ulo.

Nagpamasahe ini sa kaupod nga preso apang wala nadayon sang nag-ubo, nagsuka kag gulpi lang nagtiskog. Ginhingagaw dala sa clinic si Villanueva apang wala na nagaginhawa gani gindala sa Western Visayas Medical Center apang gindeklarar nga napatay.

Ginpahayag ni Papilera nga madugay na nagasuprer sang pneumonia si Villanueva. Napreso si Villanueva bangud sa pagbaligya sang illegal nga druga duha ka tuig na ang nakaligad. Indi naman komporme ang pamilya sang inmate nga napatay ini sa balatian gani ila nga ipa-autopsy.